თუ გსურთ, იყოთ ლამაზი, მომხიბვლელი და ასაკმა ნაკლებად დაატყოს კვალი თქვენს გარეგნობას, ამისთვის განუწყვეტლივ უნდა იზრუნოთ. ნუ იფიქრებთ, რომ სილამაზე თანდაყოლილი თვისებაა, რომ მისი შეძენა შეუძლებელია. ყოველი ქალი თავისებურად ლამაზი და განუმეორებელია. მთავარია, ამ სილამაზეს მოვუაროთ და შევინარჩუნოთ.

ყოველ დილით გააკეთეთ დილის გამამხნევებელი ვარჯიში. შეგიძლიათ, ინდივიდუალურად შეარჩიოთ ვარჯიშების სისტემა. შემდეგ მიიღეთ ცივი შხაპი ან დაიზილეთ ტანი ცივი ტილოთი. კარგი იქნება, 1 საათი სუფთა ჰაერზე ისეირნოთ.

საღამოობით პირი დაიბანეთ გადადუღებული წყლით, სახესა და ყელზე წაისვით მკვებავი, ხოლო ხელებზე - დამარბილებელი კრემი. 

გარდა ამისა, დილა-საღამოს აუცილებლად გაიხეხეთ კბილები. ხეხვა ხდება როგორც ჰორიზონტალური, ისე ვერტიკალური მიმართულებით.

კვირაში ერთხელ გაიკეთეთ მანიკიური. ძვირიან სალონებში სიარული აუცილებელი არ არის - გამონახეთ მცირე ხანი ამ პროცედურისთვის. როცა ხელები მოვლილია, ქალი თავს კომფორტულად გრძნობს.

მოუარეთ თმას - ლამაზი თმა ხომ ქალის სიამაყეა, რომელსაც მამაკაცები განსაკუთრებულ ყურადღებას აქცევენ და ყოველთვის ამჩნევენ. შეარჩიეთ შამპუნი თქვენი თმისა და კანის თვისებების გათვალისწინებით, ბალზამი. თუ ყოველ დაბანაზე არა, თვეში ერთხელ მაინც გაიკეთეთ თმის მკვებავი ნიღაბი.

ყელის კანი მეტისმეტად ნაზია, ამიტომ სახეზე ადრე ჭკნება და ბერდება. გარდა ამისა, 30 წელს გადაცილებული მრავალი ქალისთვის პრობლემას წარმოადგენს ღაბაბი. მის თავიდან ასაცილებლად უარი უნდა ვთქვათ მაღალ სასთუმალზე, ვისწავლოთ თავის სწორად დაჭერა. კარგი იქნება, თუ ხშირად ივლით თავზე წიგნდადებული, გამოიყენებთ ვიტამინებით მდიდარ მკვებავ კრემებს და კვირაში ორჯერ მაინც გაიკეთებთ ზეთის კომპრესს.

სრულყოფილ სხეულზე ყველა ქალი ოცნებობს, მაგრამ, სამწუხაროდ, ამით ყველა ვერ დაიკვეხნის. დიდი ნებისყოფისა და მონდომების შედეგად შეგიძლიათ თავი ასე თუ ისე "შეილამაზოთ", მაგრამ, სამწუხაროდ, არც ამის საშუალება აქვს ყველას, ამიტომ სცადეთ, გემოვნებითა და სწორად შერჩეული ტანსაცმლის მეშვეობით დაფაროთ ან ნაკლებად შესამჩნევი გახადოთ თქვენი ნაკლი. ჩაიხედეთ სარკეში და კრიტიკულად დააკვირდით საკუთარ თავს. აღიარეთ, რა ნაკლი გაქვთ და რას შეიძლება გაუსვათ ხაზი, რისი დაფარვა ან გამოჩენაა საჭირო.

თუ მსხვილი და მოკლე კისერი გაქვთ, ერიდეთ მძივებსა და ყელსახვევებს, ფართო და მაღალყელიან ტანსაცმელს, ჩაიცვით გულამოჭრილი სამოსი. გარდა ამისა, მოკლედ შეჭრილი ან მაღლა აწეული თმა ყელ-კისერს "დააგრძელებს", ხოლო მხრებზე ჩამოშლილი კიდევ უფრო "დაადაბლებს".

თუ გრძელი და გამხდარი კისერი გაქვთ, ატარეთ ლამაზად გამონასკვული ყელსახვევი, ჩაიცვით დახურულყელიანი ტანსაცმელი, ხოლო ღრმად გულამოჭრილ საღამოს კაბებზე გაიკეთეთ მსხვილი მძივი ან ყელსაბამი. ერიდეთ წვრილ მძივებსა და ძეწკვებს. კიდევ უფრო დაგამშვენებთ გრძელი თმა.

სწორსა და მაღალ ყელს ნებისმიერი ფორმისა და ზომის საყურეები უხდება, მაგრამ თუ დიდი ყურები გაქვთ, მსხვილი საყურე უფრო შესამჩნევს გახდის თქვენს ნაკლს. თუ დაბალი და მსხვილი კისერი გაქვთ, არავითარ შემთხვევაში არ ატაროთ გრძელი საყურეები - სადა, პატარა საყურეები გაიკეთეთ.

ამრიგად, თუ ყოველდღე 15-20 წუთს მაინც დაუთმობთ საკუთარ თავს, სიბერე ძალიან გვიან გეწვევათ - ქალი ხომ იმხელაა, რამხელას იერიც აქვს. მაშ, გაიმართეთ, ასწიეთ თავი და ყელმოღერებულმა იარეთ!